Otyrar aýdanyndaǵy Baltakól, Maıaqum eldimekenderinde  shaǵyn arnaýly áleýmettik qyzmet kórsetý bólmeleri ashyldy.

Qazaqstan Respýblıkasyndaǵy múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2012–2018 jyldarǵa arnalǵan is-sharalar josparynyń úsh kezeńin negizge ala otyryp, ár jyl saıyn tıisinshe júzege asyrylyp kele jatqan ıgilikti shara bıylǵy jyly atalǵan eldimekenderde de qolǵa alynǵan bolatyn.

Arnaýly áleýmettik qyzmet sapasyn jaqsartý, múgedektigi bar balalardy bolashaqta qoǵamdyq ortada ózin-ózi ustaýǵa, adamdarmen emin-erkin qarym-qatynas jasaýǵa, ózin teń dárejede sezinýge úıretýdi maqsat etken arnaıy bólmelerdiń saltanatty  ashylýyna qatysqan Otyrar aýdanynyń ákimi Aıtahanov Erlan Qýanyshuly turǵyndar men balalardy qýanyshtarymen quttyqtap, lentasyn qıdy. 

"Elbasymyz Nursultan Ábishuly Nazarbaevtyń  bastamasymen elimizde múmkindigi shekteýli azamattarǵa qamqorlyq jasaý basty nazarǵa alynyp otyr. 

Esterińizde bolsa, ótken jyldyń sońynda Úıde áleýmettik kómek kórsetý mekemesi janynan áleýmettik qyzmet kórsetý ortalyqtarynyń jelisin damytý maqsatynda syıymdylyǵy shaǵyn áleýmettik kúndizgi qatynaý bólmesi ashylyp, qyzmet kórsetýde.
Búginde aýdan boıynsha Múmkindigi shekteýli balalarǵa úıde áleýmettik qyzmet kórsetý bólimshesinde 89 múmkindigi shekteýli balalar kútimge alyndy"-degen aýdan basshysy búldirshinderge arnaıy syılyqtar tabys etti.

Otyrar aýdany ákimdiginiń qoldaýymen, kásipkerlerdiń demeýshiligimen jabdyqtalǵan áleýmettik bólmede medısınalyq, psıhologıalyq, pedagogıkalyq, mádenı kómekter kórsetiledi.

Bastamaǵa aýyl turǵyndary men ata-analar da alǵystaryn bildirdi. Bala kútimimen jumysqa shyǵa almaı, alańdaǵan analar balalary úshin jaǵdaı jasap, qoldaý kórsetken aýdan basshylyǵyna rızashylyqtary sheksiz ekendigin jetkizdi.